INTERLUDE

Oang Kadayan Babuu Payau





Sdr Arkin Hj Garai
Pegawai Penyelidik
Pusat Pemprosesan dan Penyelidikan Makanan Ternakan Lok Kawi





Disabab akan artikal yang ku tulis di dalam blog ani hantap baat asanya, yang mbaca pun mungkin langu sudah, jadi ani tah ku salat akan caita panglipur lara yang diantat oleh kawan baikku Sdr Arkin Hj Garai daie Kota Kinabalu.

Sdr Arkin Hj Garai ani oang Kadayaan banaa daie Sipitang. Dalam sakitaa tahun 1971/1972, lapas papaiksaan Pom 5, kami bakaaja di Kota Kinabalu dan diam aah umah siwa di Sambulan. Yang sabanaanya kami nyiwa bilik nganya, bukan nyiwa umah. Bilik yang kami siwa atu damit nganya. Siwanya bila indaku kalupahan 50 Inggit sabulan babahagi tiga oang. Batiga tah kami diam sabilik iaitu Sdr Arkin Hj Garai, Sdr Safar Yaakob dan aku. Masa atu bilang oang kami kakal bujang.

Umah siwa atu bahatap jink inda basiling, bila sambat hantap sajuknya tapi amun kia-kia matahaie sudah atas bumbunan, hangatnya kan mbaie pusah, inda dapat dicaita akan. Bila aie minggu inda olah tiduu subalah tangah haie.

Dalam patangahan tahun 1972, masing-masing mbawa diee, aku ka KL balajaa, Sdr Arkin pun balajaa jua, macam atu jua Sdr Safar. Lapas atu Sdr Arkin ka Amerika Syarikat, aku ka UK dan Sdr Safar bila inda ku silap jadi Cikgu. Tadangaa habaa Sdr Safar pincin sudah ya, kaang ani manatap di Labuhan.

Ani kan bagalap-galap nganya uja dangan, macam ani caita yang diantat oleh Sdr Arkin. Nama caitanya atu “OANG KADAYAN BABUU”. Macam ani caitanya.

Alum batah hantap jua - oang Kadayan ani babuu payau - di bawa nya sama kuyuk hidupannya. Dalam pajalanan babuu kuyuk nya bacaai (bapisah) dai tuan nya.
Dalam kasadihan oang ani pun inda tahu lagi mana ah kuyuk nya. Kuyuk ani nganya haapan untuk luih babuu macam bilang kali ; Nasip nya baik inda samana-mana ia tadangaa bunyi salak kuyuk nya.

Dituut akan nya bunyi salak kuyuk atu sampai tah tajumpa sabuah sungai. Tapi bila sudah di sungai atu inda lagi tadangaa bunyi2 kuyuknya atu, tapi oang atu inda putus asa kan ndapatkan kuyuk nya atu sabab ia hantap picayanya yang kuyuk nya atu inda jauh daie sungai atu. Lihat punya lihat di sungai atu ada aiing buinih-buinih ah limbauuh sungai hampii siing nya melihat-lihat kuyuk kasayangan nya atu. Oang atu hantap jua kan tahu apa bangsanya yg buinih-buinih ah limbauh atu jadi di ingatinya banaa2.

SAKALI TAHU KUYUK NYA TIMBUL DAIE AIING MBAWA KALI SUNGKO AH MULUTNYA . . ."

Bah atu tah nganya panyudahan caita ani. Bila kamu ada caita-caita Kadayan, antat aah ku. Dapat jua kita dangaa-dangaa.

Taima kasih banyak-banyak aah Sdr Arkin Hj Garai. Batambah-tambah hensem liau kita ani.