Monday, October 8, 2007

NOSTALGIA HARI RAYA (TAHUN 60an)


Part 3

Bahasa : Kadayan Sabah
Amaran : Jangan sekali-kali bermain meriam buluh. Ia amat merbahaya dan boleh menyebabkan kecederaan yang serius.

Aie diee damit mulanya pakaian aya yang bahaau jaang dapat. Uja dangan apa yang ada dipakai. Tahu sajalah kaadaan masa atu, bukan nya sanang. Paindungan pun susah, kami bapadiaan pun amai, jadi pakaian aya atu memang jaang dapat. Cuma yang ku ingat, bila kan aya atu, mama bawa ku bagunting ambut nganya. Satu lagi kopiah, amun kopiah diee to hantap sudah lamanya, caik sana caik sini, waananya pun sudah baaubah daie hitam jadi kakuning-kuningan (salajuu kana hujan), bahaau tah mama mbali akan kopiah yang bahaau. Aie diee damit mulanya, ka sikolah pun bakopiah, bila inda makai kopiah kana maahi oleh indung. Kopiah sabuting nganya, dipakai bilang haie, apa gayanya kan tahan kian. Atu pun kala-kala dapat jua sampai tiga tahun bahaau tia batukaa.

Kahidupan diee mulanya inda sanang, kala-kala amun diee malihat paanak kaang ani, tiap-tiap minggu mbali baju, saluaa macam-macam dibali, nangis dalam hati nganya diee oang tuha nie. Atu balum lagi mbali hanphone yang haaganya labih saibu inggit. Atu tah uja dangan, jaman baubah, kahidupan pun baaubah. Inda dapat kita banding akan jaman kita mulanya dian jaman paanak kaangani.

Diee mandi mulanya bukan ya mandi aing paip nih. Sambat-sambat lagi sabalum hayam tuun daie aban uja dangan, kasungai tah diee kan mandi. Amun kan dikanang, mandi disungai aie sambat tu hantap sajuknya! Sampai katulang bah asanya. Tapi dipaksa jua, inda olah nih kan sambahyang sunat aya di suuau.

Di kampung diee mulanya, suuau inda ada sambahyang Jumaat, sabab inda cukup jalama 40 oang. Tapi amun Aie Aya, panuh bah suuau, ada yang sambahyang di tanah lagi. Bilakan dipikee-pikee akan, sambahyang Aya tu sunat nganya, tapi sambahyang fardhu ditinggal akan. Hantap inda luus bunyinya jamu. Tapi inda olah, masa atu diee pun kakal damit, balum tahu apa-apa.

Amun sudah mulih sambahyang sunat Aya, patuhaan pun bacaita:

“Hantap amainya dangan sambahyang tu antaie, inda tabuat di dalam, sampai kaluaa dangan sambahyang”

Ada tia yang nyahut tu, “Aau amai tu, tahun lapas pun inda sampai macam ani.”

Jadi macam biaksalah oang patuhaan, sambil-sambil makan kalupis bacacah dian kari ayam atau kari payau, banyak tia caitanya. Minuman jaman atu inda ya ada macam kaangani, yang ada kopi dian teeie nganya. Tapi amun sudah tajumpa kalupis dian kari payau, eeh hantap baik asanya atu. Mbaie tais liuu.

Mulanya, umah tabuka ani inda ada, siapa-siapa yang kan badudun aie Aya, datang tah saja. Kalupis wajit tahan sampai 3 -4 haie, yang capat abis lauknya nganya. Tapi oang mulanya inda ya bakia hantap, apa yang ada dimakan, bila inda ada inda ulah jua.

Bersambung.......

2 comments:

Amde Sidik said...

Cuma kamu tanung2.Mun ada paluang:tantang ejaan dan bunyi (logat) Kadayan, mun dapat sakadayan-kadayannya.Ku lihat kamu tu mbuat sajaah-maksudku, nulis dalam kadayan. Hj Ramli ada baciata aah ku kan nulis buku yang tulisanya kadayan macam yang kamu buat ni.Lihat Allan Maxwell, Urang Darat, 1981 published by University of Yale, ada dikit2 malibatkan bunyi dan ejaan. Tapi nda ku saatus paatus sanuju tapi ada sistam.Satakad ani atau ngaya yang hampie-sabab bacampuu boonai sudah.
Kadayan PM Sariffuddin hantap nda tapakaiku sabab macam di buat2nya. Ku hagaa ka Boonai inda ada miatu.Ada ku ista dikit2 dalam The Mystic of Borneo.Biani aiingku Presiden Persatuan Kadayan dua uang kadayan sabagai wakil persatuan Kadayan ka Dewan Bahasa dan Putaka, si Mahmud Osman jan si Bidin Hj Latif-ada sudah tutuu kadayan yang di daftaa-tulis di dictionary malayu.
Satakad ani, kasimpulanya: tutuan kadayan inda ada bunyi "O" mulut kadayan ni malas tia kan bapulas-pulas. Yang kamu sudah tahu inda ada bunyi "e" "r" kacauali tutuan yang dipinjam. Hubungi si Mahmud. Mun tantang gasing hubungi si Bidin.
salam

Maslina Mahbu @ Armiza Nila said...

Salam Askasah,

Seronoknya saya membaca dialek Kedayan.

Tahun ni kami tak ber aya di Lawas. Mungkin tahun dapan kami ber aya di sana.

Rindu nak bercakap Kadayan cuma belum mahir banaa...

Tahniah atas kelahiran blog ini..

Armiza Nila - Kuching