KOMEN TAMBAHAN BAKAITAN "TAKUIN"

By Haji Ramlee Dua



This is in reply to Sdr Salim's comment regarding my brief on "Takuin".

Hijrah ani haatinya "balalih", uja kita. Dalam ejaan bahasa Latin "Hegira".

Sabab Nabi Muhammad balalih ke Madinah ada dua (1) uang Makkah nda gunakan ia (2) ada jamputan uang Madina nyuuh ia babalih kasana.

Mun nuut sajaah jaan kiaan aibulan kalendaa Julian, tahun nabi balalih ialah 622 masehi. Mun dikia dai Gregorian Calender lain itu ya kaana gaya ngia sudah ba ubah. Jadi haatinya, tahun hijrah mun nuut kalendaa Gregory yang kana pakai kaangani ukan ya tahun 622 masehi, tapi kana ucapakan nganya tahun 622 masehi supaya dangan nda baapa bingung.

Takuin Islam jaan takuin Julian atau Gregory inda dapat disama akan kaana pajalanannya lain hantap, macam lusee kuyuk jaan sumazau..manakan sama, walaupun kadua-duanya anggut-anggut.

Taapi yang paalu jua dikatahui, ai jaman Nabi balalih, kalendaa bulan (Lunar calender) sudah ada di Arabia. Dama bulan waktu atu sudah ada, tapi jumlah tahun inda ba kia. Uang Aab nganya ngia bulan. Jadi mun nuut sajaah, Nabi balalih pada ai Khamis, 26 aibulan Safar. Mun dikia dai kalendaa Julian, basamaan 9 aibulan September, 622.

Tapi ada jua sahabat jaan paadian Nabi yang balalih labih awal. Dalam tahun 615 masehi ada yang lai ka Habsyah. Ada ku maasai datang ka aah pakampungan sahabat Nabi sana. Jalamanya batutuan Aab. Ada ku sambahiang aah makam bapa patuan Nabi (tapi inda ku baapa ingat lagi dama bandaanya). Makanya naagi Habsyah inda kaan saang ulih tantra Islam ai jaman ugama bakambang, kaana nabi ngingatakan uang-uangnya yang aja Habsyah ada malindungi sahabat jaan paadiannya ai jamannya jaih. Makanya naagi Habsyah kakal jadi naagi Kristian sampai kaangani.

Jadi mun Nabi balalih ka Madinah pada 26 aibulan Safar, ngapaya tahunnya balalih dijadiakan tah pulang tahun paatama kalendaa Islam?

Banaanya kalendaa Islam ani nganya disatujui 17 tahun lapas Nabi balalih. Banyak cadangan yang kana cuba-cuba. Ada yang kan makai kalendaa Rome, ada yang kan makai kalendaa Parsi badama "Mahroz", tapi hujung-hujungannya Saidina Umar bapikee ada baiknya diadakan kalendaa sandii. Jadi dalam tahun 638 masehi diadaakan tia kalendaa Islam, tapi digostan akan 17 tahun kaana ngia ai mula nabi balalih. Bulan paatama yang dipakai ialah Muharram walaupun ai banaa Nabi balalih ukannya 1 aibulan Muharram......Haji Ramlee Dua